- ხორბლისა და ფქვილის მწარმოებელთა ასოციაციის ინფორმაციით, 2023 წლის ივნისიდან წისქვილკომბინატების მიერ 25 000 ტონაზე მეტი ქართული სასურსათო (საწისქვილე )ხორბალია მიღებული, რაც ყოველწლიურ საშუალო მაჩვენებელზე მეტია.
“დღეს საქართველოს ბაზარზე წარმოდგენილია როგორც იმპორტირებული, ასევე ადგილობრივი წისქვილკომბინატების მიერ წარმოებული ფქვილი, ქართული ხორბლის ჩაბარებასთან ერთად ხორციელდება ხორბლის იმპორტი. 2023 წლის ივნისიდან წისქვილკომბინატების მიერ მიღებულია 25 000 ტონაზე მეტი ქართული სასურსათო (საწისქვილე )ხორბალი, რაც ყოველწლიურ საშუალო მაჩვენებელზე მეტია, დღეს აქტიურად მიმდინარეობს ხორბლის მოსავლის აღება ჩაბარება ქვემო და შიდა ქართლში. მოცემულ პირობებში, დღეს იმპორტირებული მე-3 კლასის სასურსათო ხორბლის ფასია 70 თეთრი/კგ (59 თეთრი დღგ-ის გარეშე). რადგან ქართული ხორბალი დღგ-სგან გათავისუფლებულია, შესაბამისად, ადგილობრივი ხორბლის შესყიდვის ფასი 59 თეთრზე ფორმირდება, რაც განაპირობებს წისქვილკომბინატების მიერ გამოშვებული ფქვილის ფასს – 47-48 ლარი/ტომარა. ფასზე კრიტიკულ წნეხს ახდენს იმპორტირებული ფქვილის შემოტანის მზარდი დინამიკა, მკვეთრად შემცირებული ფასით – 45 ლარი/ტომარა (შემდგომი კლების ტენდენციით).
ამასთან, ხორბლის ბაზარზე ბოლო პერიოდში მიმდინარე მოვლენებმა, რუსეთის გამოსვლამ „ხორბლის დერეფნის“ შეთანხმებიდან, უკრაინის პორტების ინფრასტრუქტურის დაზიანებამ, რუსეთის მხარის განცხადებამ, რომ ნებისმიერი გემი შემავალი უკრაინის პორტებში განიხილება როგორც სამხედრო დანიშნულები და განადგურდება, უკრაინის მხარის საპასუხო განცხადებამ, რომ რუსეთის პორტებში შემავალი ნებისმიერი გემი ჩაითვლება სამხედრო ტვირთების გადამტანად და შესაბამისად განადგურდება, სერიოზულად გაზარდა შავი ზღვით ტვირთების, მათ შორის ხორბლის გადაზიდვების რისკები. ამ რისკებიდან გამომდინარე, შავი ზღვაზე გემების მიმოსვლა უკრაინის და რუსული საზღვაო აკვატორიაში სერიოზულად შეფერხებულია. უპრეცედენტოდ გაზრდილია ლოჯისტიკა (ტრანსპორტირების ფასი) მათ შორის რუსეთის პორტებიდან, სრულიად გაჩერებულია უკრაინის პორტები, ასევე სერიოზულად გაზრდილია ტვირთის დაზღვევის ფასები. ტვირთების ნაწილი გადართულია რუმინეთის პორტების, აგრეთვე მდინარე დუნაის მიმართულებით და ევროპის სატრანზიტო დერეფანზე, თუმცა გაზრდილი ფასებით. სწორედ შავი ზღვის გადაზიდვებში არსებული გაურკვევლობა არის ამერიკის და ევროპის ბირჟებზე (ჩიკაგოს და პარიზის ბირჟებზე) ფასების რეკორდული ზრდის მიზეზი.
შავი ზღვაზე გაზრდილმა რისკებმა შეზღუდა ზღვით ხორბლის გატანის რაოდენობა, აგრეთვე, შარშან, რუსეთში დარჩენილმა საექსპორტო გაუყიდავმა ხორბალმა, რომელსაც ემეტება ამჟამად მიმდინარე მოსავლის აღების პერიოდი და ახალი საექსპორტო რაოდენობა, რუსული რუბლის გაუფასურებამ, ზეწოლა მოახდინა რუსეთის შიგნით ხორბლის საექსპორტო რაოდენობის მოცულობის ზრდაზე. რადგან აღნიშნული ხორბლის საპროგნოზო რაოდენობა ვერ გადის ზღვით, რაც მთავარი საექსპორტო ლოჯისტიკური მიმართულებაა, ჭარბი რაოდენობა აწვება რუსეთის შიდა ბაზარს, ფასების კლებას იწვევს შიდა ბაზარზე და სახმელეთო საექსპორტო გადაზიდვების მიმართულებებით, სადაც შავი ზღვისაგან განსხვავებით, რისკები არ არსებობს. შესაბამისად ხორბლის ფასთან ერთად, ლოჯისტიკური ხარჯებიც დაბალია, რაც უპირველეს ყოვლისა, ფქვილის და ხორბლის იმპორტის ფასების კლების მიმართულებით აისახება და უპირველესად საქართველოს მიმართულებით.
იგივე ტენდენციები ვითარდება სხვადასხვა დოზით, კავკასიის სხვა ქვეყნების, ასევე ირანის, შუა და წინა აზიის ქვეყნებში, რომელთა ლოჯისტიკა რუსეთიდან ხორბლის სახმელეთო ტრანსპორტირებასთანაა დაკავშირებული.
საქართველოს ხორბლისა და ფქვილის მწარმოებელთა ასოციაცია, კიდევ ერთხელ, აღნიშნავს, რომ პასუხისმგებლობას იღებს სრულად ჩაიბაროს ქართული ხორბლის მოსავალი შესაბამისი ხარისხიდან გამომდინარე შესაბამის ფასად. მზაობას ვაცხადებთ მუდმივ კომუნიკაციაში ვიყოთ დაინტერესებულ მხარესთან ნებისმიერი საკითხის ოპერატიულად გადაწყვეტის მიზნით“,-ნათქვამია განცხადებაში.